Assalomu alaykum, hurmatli tumanimiz aholisi!

Avvalo, Siz aziz fuqarolarni kirib kelayotgan yangi 2026 yil bilan chin yurakdan muborakbod etaman. 2026 yilni “Mahallani rivojlantirish va jamiyatni yuksaltirish yili” deb e’lon qilindi. Yangi yilda tumanimizgi mahallalar infratuzilmasini yaxshilaymiz. Yangi yil barchamizga muborak bo‘lsin, yurtimizda amalga oshirilayotgan islohotlar, xususan ichki ishlar tizimidagi o‘zgarishlar jarayonida faol ishtirok etayotganingiz, jinoyatchilikka qarshi kurashish, huquqbuzarliklarning oldini olish, fuqarolar xavfsizligini ta’minlashda mas’uliyat bilan yondashayotganingiz uchun chuqur minnatdorchilik bildiraman.

Shu o‘rinda, sizning ruxsatingiz bilan tumanimiz hududidagi kriminogen vaziyat to‘g‘risida axborot berib o‘tsam!

2025-yilning 12 oyida tumanning kriminogen vaziyatini barqarorlashtirish, jinoyatchilikka qarshi kurashish va fuqarolar osoyishtaligini ta’minlash borasida tuman ichki ishlar organi tomonidan bir qator tizimli ishlar amalga oshirildi.

Jumladan, joriy yilda 28 788 nafar huquqbuzarlik sodir etgan shaxslar aniqlandi, 57 nafar shaxslar Reabilitatsiya markaziga joylashtirildi, 70 nafar profilaktik hisobda turgan ruhiy kasal, giyohvand, spirtli ichimlikka ruju qo‘yganlar majburiy davolanishga yotqizildi, 258 nafar tazyiq va zo‘ravonlikka uchragan xotin-qizlarga “Himoya order”lari berildi.

Tumanimizda olib borilgan tadbirlar natijasida, 2025 yil 12 oyida, tumanda oldi olinishi mumkin bo‘lgan jinoyatlar 17,1 foizga, xususan qasdan odam o‘ldirish jinoyati  87,5 foizga, transport vositalarini olib qochish jinoyati 50 foizga, nomusga tegish jinoyati 20 foizga, yengil tan jaroxati yetkazish jinoyati 4,2 foizga, talonchilik jinoyati 40 foizga, hamda o‘g‘irlik jinoyati 12,3 foizga, firibgarlik jinoyati 5,5 foizga,  kamayishiga erishildi.

Hurmatli fuqarolar!

Yuqorida keltirilgan ijobiy natijalarga qaramay, tumanimizda ayrim jinoyat turlari hali-hamon sodir etilishdan to‘xtamayapti va kriminogen vaziyatning barqarorligiga o‘z salbiy ta’sirini o‘tkazmoqda.

Tumanda sodir etilgan jinoyatlar tahlili, ularning kelib chiqish sabablari o‘rganilib, asosiy e’tibor xavfsiz mahalla tamoyili asosida fuqarolarimizga qulay shart-sharoit yaratishga qaratilmoqda.

Bunda, tumandagi 2 ta mahalla (Obod va Buyuk Turon) tanlab olinib, videokuzatuv kameralari o‘rnatish uchun mahallalar taftishdan o‘tkazilib chiqildi.

Jumladan, ushbu mahallalarda jami 49 ta kameralar o‘rnatilishi rejalashtirildi.

Shundan, 36 tasi shaxsni aniqlovchi (FACE ID), 8 tasi davlat raqamlarini aniqlovchi, 1 tasi PTZ va 4 tasi kuzatuv kameralari.

Mazkur kameralarning 48 tasi ko‘chalarga, 1 tasi ijtimoiy ob’yektlarga o‘rnatiladi.

Ma’lumot uchun:

– “Buyuk Turon” mahallasida jami 35 ta kamera o‘rnatiladi.

Shundan, 26 tasi shaxsni aniqlovchi (FACE ID), 4 tasi davlat raqamlarini aniqlovchi, 1 tasi PTZ va 4 tasi kuzatuv kameralari.

Mazkur kameralarning 34 tasi ko‘chalarga, 1 tasi ijtimoiy ob’yektlarga o‘rnatiladi.

– “Obod” mahallasida jami 14 ta kameralar o‘rnatiladi.

Shundan, 10 tasi shaxsni aniqlovchi (FACE ID), 4 tasi davlat raqamlarini aniqlovch kameralari.

Mazkur kameralarning 14 tasi ko‘chalarga o‘rnatiladi.

Shuningdek, qulf-kalit tizimini samarali yo‘lga qo‘yish maqsadida, mahallalar hududiga kirib kelayotgan barcha fuqarolarni, 3 toifaga ya’ni, “Yashil” – mahallada muqim yashovchi fuqarolar, “Sariq” – ijtimoiy va kommunal xizmat ko‘rsatish xodimlari  va “Qizil” – begona shaxslar toifalarga ajratib olinadi.

Bu orqali, mahalla hududida sodir etilgan jinoyatlarning “issiq izi”dan ochishga hamda huquqbuzarlik va jinoyatchilikning oldini olishga erishiladi.

Hurmatli fuqarolar!

E’tiboringizni yana bir o‘ta muhim bo‘lgan masalaga qaratmoqchiman.

Joriy yil davomida, tumanimizda xonadon va savdo do‘konlaridan o‘g‘irlik sodir etilishi kamaygan bo‘lsada, biroq ushbu holat hamon kuzatilmoqda.

Tuman Qo‘riqlash bo‘limi bilan hamkorlikda yuqoridagi holatlarning oldini olish maqsadida, ko‘p qavatli uylarning eshiklariga 1105 ta domofonlar, uylarning kirish yo‘laklariga 458 ta tashvish tugmalari o‘rnatildi, 360 ta savdo muassasalari va 1474 ta xonadonlar tezkor qo‘riqlovga olindi.

Mahallalarda fuqarolarni ogohlikka chaqiruvchi “Hudud kamera nazoratida!”, “Ob’yekt qo‘riqlovda!” hamda “Xonadon qo‘riqlovda!” kabi jami 402643 ta stikerlar joylashtirildi, mahallalarda 104 ta “namunaviy xavfsiz ko‘cha” hamda

260 ta “namunaviy xavfsiz yo‘lak” tashkil etildi, ichki yo‘llar va ko‘chalar 149 ta yoritish vositalari bilan ta’minlandi.

Hurmatli tumanimiz aholisi!

Yunusobod tumani Ichki ishlar organlari faoliyatini muvofiqlashtirish boshqarmasi bundan keyin ham siz aziz yurtdoshlar bilan hamkorlikda jinoyatchilikka qarshi kurashishda, huquqbuzarliklarning oldini olishda, xavfsiz va osoyishta hayotni ta’minlash yo‘lida bor kuch va imkoniyatlarini safarbar etadi.

Sizlardan iltimosimiz – hushyorlik va ogohlikni doimo saqlab, huquqbuzarliklarga befarq bo‘lmaslik, har qanday shubhali harakatlar to‘g‘risida Ichki ishlar organlariga zudlik bilan xabar berib borishingizni so‘raymiz.

Barchangizga tinchlik, xotirjamlik va farovonlik tilaymiz.

E’tiboringiz uchun rahmat!