Bugun Yunusobod tumanidagi Uvaysi mahallasida barcha yoshlardagi fuqarolarni birlashtirgan intellektual musobaqa, ya’ni shaxmat turniri katta qiziqish bilan o‘tkazildi. Ushbu musobaqa Xalq deputatlari Yunusobod tuman Kengashi deputati Aleksandr Em boshchiligidagi faollar guruhi — Olesya Li, Evgeniy Shek va Nargiza Sattarova tashabbusi bilan tashkil etildi.

  Ushbu tadbir mahallada ahillik, hamjihatlik va sog‘lom turmush tarzini targ‘ib qilish, ayniqsa, yoshlar o‘rtasida intellektual o‘yinlarga bo‘lgan qiziqishni oshirish, aql-idrokni, strategik fikrlash qobiliyatini rivojlantirish maqsadida uyushtirildi. Bu nafaqat sport musobaqasi, balki mahalla ahlining birligi, aql va muloqot, ezgulik va ijobiy muhit tantanasi bo‘ldi.

  Turnirda turli yoshdagi ishtirokchilar — yosh bolalardan tortib, keksa shaxmat ixlosmandlarigacha faol qatnashdilar. Ular o‘rtasida qizg‘in va murosasiz bahslar kechdi. Qarshi tarafning yurishlarini tahlil qilish, to‘g‘ri strategik qarorlar qabul qilish va oqilona fikr yuritish kabi muhim shaxmat malakalari namoyon etildi.

  Turnir jarayonida qatnashchilar nafaqat o‘yin, balki muloqot va o‘zaro tajriba almashish imkoniga ham ega bo‘ldilar. Kattalar o‘z hayotiy tajribalari va shaxmat sirlari bilan o‘rtoqlashdi, yoshlar esa o‘zining ziyrakligi va zamonaviy yondashuvlarini namoyon etdi.

  G‘oliblar turli nominatsiyalar bo‘yicha aniqlanib, ular diplom va esdalik sovg‘alari bilan taqdirlandilar. Shu bilan birga, barcha ishtirokchilarga tashakkurnomalar va kichkina sovg‘alar berildi. Bu esa ularni yanada kuchliroq motivatsiya bilan kelgusi tadbirlarda ishtirok etishlariga turtki bo‘ladi.

  Tadbir yakunida tashabbuskorlar va mahalla faollari shaxmat turnirini muntazam ravishda o‘tkazish, uni an’anaga aylantirish haqida fikr bildirishdi. Bu kabi intellektual tadbirlar jamiyatda ma’naviy va madaniy muhitni boyitish, insonlarda intizom, mas’uliyat va zehn tezkorligini shakllantirishda muhim ahamiyat kasb etadi.