Biz ushbu tadbirlarning boshlanishi, qonunchilik talablari va biznes yoki qurilish bilan muammosiz va stresssiz shug‘ullanish uchun rioya qilinishi kerak bo‘lgan tartib haqida avval xabar bergan edik.  Bugungi vaziyat yana bir bor yerdan foydalanish masalalarida qonuniylikning naqadar muhimligini eslatmoqda.

Bunga misol tariqasida Yunusobod tumanidagi "Billur" mahallasi Rixsiliy ko‘chasida joylashgan obyektni keltirish mumkin. Bu yerda 1,6 ming kvadrat metr maydon noqonuniy egallanib, hech qanday kadastr hujjatlarisiz va yer solig‘i to‘lanmasdan tartibsiz savdo binosi qurilgan. Ushbu bino ortidagi, aynan turar-joy binolari ro‘parasidagi hudud esa spirtli ichimliklar iste’mol qilinadigan, axlat to‘planadigan, antisanitariya hukm suradigan joyga aylangan.

Sudning 2022 yil 10 avgustdagi qarori bilan tadbirkor - "Yasmin Gold Auto" MCHJga qurilmani mustaqil ravishda demontaj qilish majburiyati yuklatilganiga qaramay, u bir necha bor yozma ogohlantirilishiga qaramasdan, qarorni bajarmadi, hattoki savdo maydonini kengaytirishni davom ettirdi. Hozirda kadastr organlari, Majburiy ijro byurosi va hokimiyat tomonidan tadbirkorga mustaqil ravishda demontajni boshlash, qurilish chiqindilarini olib chiqib ketish va yerdan noqonuniy foydalanganligi uchun jarima to‘lash majburiyati yuklatilgan. Videoda ko‘rinib turganidek, jarayon davom etmoqda.

Bu yagona hodisa emas. Faqatgina Yunusobod tumanining o‘zida 2024-yilda umumiy maydoni 5,3 gektar bo‘lgan 355 ta shunday obyekt aniqlangan. Bu shunchaki raqamlar emas - bu shahar va qonuniy tadbirkorlikni rivojlantirish uchun boy berilgan imkoniyatlar, shuningdek, huquqiy me’yorlarning to‘g‘ridan-to‘g‘ri buzilishidir.

Shu bilan birga, qonunchilik talablari nafaqat tijorat obyektlariga, balki turar-joy binolariga ham taalluqlidir. Ruxsat beruvchi hujjatlarsiz qurilgan inshootlar, ularning vazifasi va maydonidan qat’i nazar, demontaj qilinadi. Bunday xatolarga yo‘l qo‘yganlar uchun yagona yo‘l - sud organlarining ko‘rsatmalarini bajarish orqali qoidabuzarlikni bartaraf etish; barcha hujjatlarni Toshkent shahrida amal qilayotgan tartib-qoidalarga muvofiq rasmiylashtirish: auksionda ishtirok etish, yerni ijaraga olish huquqini qo‘lga kiritish va hokazo.

Biz bunday vaziyatga tushib qolgan barcha ko‘chmas mulk egalari va tadbirkorlarni savollar tug‘ilganda 71 2100163 raqamiga murojaat qilishga chaqiramiz.

Shuningdek, tadbirkorlarga tijorat ko‘chmas mulkini ijaraga olishda ijaraga beruvchining ruxsat beruvchi hujjatlari bilan sinchkovlik bilan tanishib chiqishni alohida tavsiya etamiz. Ushbu ehtiyot chorasi ortiqcha xarajatlar va yo‘qotilgan foydaning oldini olishga yordam beradi.