Bugun Yunusobod tumanidagi "Muruvvat" mahalla fuqarolar yig‘inida navbatdagi mahalla raisi saylovi yuqori saviyada va oshkoralik tamoyillariga muvofiq o‘tkazildi. Unda mahallada istiqomat qiluvchi faol fuqarolar, jamoatchilik vakillari hamda mahalla komissiyasi a’zolari ishtirok etdi. Saylov jarayonida fuqarolarning erkin ovoz berish huquqi to‘liq ta’minlandi, nomzodlar o‘z dasturlarini taqdim etish imkoniga ega bo‘lishdi va saylov ochiqlik hamda adolat tamoyillari asosida o‘tdi.

Saylov natijalariga ko‘ra, fuqarolar katta ishonch bilan Saydullo Jo‘rayevni yana mahalla raisi sifatida saylashdi. U 2019 yildan buyon mazkur lavozimda faoliyat yuritib kelmoqda va bu yilgi saylovda ham o‘zining tajribasi, faoliyatidagi ochiqlik hamda aholi manfaatlarini ustuvor deb bilgani orqali yana bir bor ishonchni qozondi.

Uning rahbarligi davrida "Muruvvat" mahallasida jamoatchilik nazorati kuchaytirildi, yoshlar va ayollar bilan ishlash, tadbirkorlikni rivojlantirish hamda infratuzilmani yaxshilash bo‘yicha qator ijobiy o‘zgarishlar amalga oshirildi. Shuningdek, mahallaning turli ijtimoiy qatlamlari o‘rtasida o‘zaro hamjihatlik va hamkorlik muhiti mustahkamlandi.

Saydullo Hasanovich Jo‘rayev o‘z so‘zida unga bildirilgan ishonch uchun minnatdorlik bildirib, oldinda turgan ustuvor vazifalar — aholining turmush darajasini yanada oshirish, yoshlar uchun keng imkoniyatlar yaratish, mahallaning obodonchiligi va xavfsizligini ta’minlash yo‘lida sidqidildan xizmat qilishini ta’kidladi.