Tasavvur qiling, siz keksaygansiz. Hayotingiz davomida ko‘plab odamlar bilan suhbatlashgansiz, ishlagansiz, yashagansiz. Lekin birdan orqaga qarab, o‘zingizga bir savol berasiz: "Men kim bo‘ldim? Nimaga erishdim?"

Ana shunda javoblar siz o‘qigan kitoblar, esingizda qolgan fikrlar va o‘zingizda shakllantirgan dunyoqarashdan paydo bo‘ladi. Agar o‘qimagan bo‘lsangiz, bu savollarga javob topish juda mushkul kechadi.

Kitob — bu inson tafakkurining, tajribasining, ruhining jamlanmasidir. Har bir kitob — bu muallif bilan o‘tkazilgan samimiy suhbat, u sizga dunyoni boshqacha ko‘rishni, muammolarga boshqa tomondan yondashishni, hayotda ma’no topishni o‘rgatadi.

Ammo inson o‘qimasa, nima bo‘ladi?

U hayotda faqat ko‘rgan-bilganiga tayansa, faqat kundalik hayot va ijtimoiy tarmoqlardan oziqlansa — bu ruhiy ochlikdir. O‘qimagan inson fikr bildirganda, so‘zlari yuzaki, qarashlari tor, hayoti esa faqat kundalik ehtiyojlar bilan cheklangan bo‘ladi. Unda tasavvur ojiz, his-tuyg‘ular sodda, dunyoqarash esa yupqa bo‘ladi.

Yana o‘ylang: bu dunyoda eng muvaffaqiyatli, eng ijodkor, eng ilhomlantiruvchi insonlar — har doim o‘qiganlar bo‘lgan. Imom al-Buxoriy, Imom Termiziy, Abu Nasr Forobiy, Abu Rayhon Beruniy, Ibn Sino, Ahmad al-Farg‘oniy, Bahouddin Naqshband, Mirzo Ulug‘bek, XIX-XX asrda yashab ijod qilgan jadid bobolarimiz...

Bularning barchasi kitob o‘qishni o‘z hayotining ajralmas qismiga aylantirganlar. Chunki ular bilgan: kitob orqali inson o‘zini topadi, jamiyatda o‘z o‘rnini topadi va tarixda iz qoldiradi.

Aksincha, o‘qimagan jamiyat — so‘roq qilmaydigan, sinchkov bo‘lmagan, o‘z fikriga ega bo‘lmagan jamiyatdir. Bunday jamiyatda yolg‘on tez tarqaladi, soxta mashhurlik hukmron bo‘ladi va asl qadriyatlar yo‘qoladi.

Shuning uchun, bugun birinchi qadamni tashlang: telefonni bir chetga qo‘ying, ijtimoiy tarmoqlardan chiqib turing va bir kitobni varaqlang. Dastlabki sahifani o‘qigach, ko‘rasiz — siz o‘z ichki dunyoningizga sayohat boshlagansiz.

Har bir o‘qilgan sahifa sizni o‘stiradi, tiniqlashtiradi, o‘zligingizga yaqinlashtiradi.

Esda tuting: kitob — bu insonni ichdan yorituvchi chiroqdir. U yo‘q bo‘lsa, biz faqat boshqalarning chirog‘ida yuramiz. Ammo o‘qish orqali o‘z chirog‘imizni yoqsak, boshqalar yo‘lini ham yoritishimiz mumkin.

Sanjar Sobirjonov,

Xalq deputatlari Yunusobod tumani Kengashi deputati