Yunusobod tumani hokimi Boxadir Abduvaliyev tumandagi 350 ga yaqin yuqori sinf o‘quvchi va yoshlar bilan samimiy uchrashuv o‘tkazdi. Tadbirning asosiy maqsadi — yoshlarni rag‘batlantirish, ularning g‘oya va tashabbuslarini qo‘llab-quvvatlash hamda ularni jamiyat hayotiga faol jalb qilishdan iborat edi.

 Suhbat davomida yoshlar o‘z orzu-umidlari, kelajakdagi rejalari va maqsadlari haqida fikr bildirdilar. Ular ilm olish, zamonaviy kasblarga ega bo‘lish, ijtimoiy va iqtisodiy rivojlanishga hissa qo‘shish, shuningdek, jamiyatda o‘z o‘rnini topish kabi masalalarga katta e’tibor qaratdilar.

 Hokim Boxadir Abduvaliyev yoshlarning bunday faolligi va tashabbuskorligini tuman taraqqiyotining muhim omillaridan biri ekanini ta’kidlab, ularning g‘oya va loyihalarini amalga oshirishda har tomonlama qo‘llab-quvvatlashini bildirdi. Shu bilan birga, hokim yoshlarni ilm-fan, sport, san’at va boshqa sohalarda faol bo‘lishga undadi.

 Uchrashuv davomida ta’lim tizimi, tadbirkorlik imkoniyatlari, innovatsion yondashuvlar, yoshlarni ish bilan ta’minlash va bo‘sh vaqtni mazmunli o‘tkazish kabi masalalar ham muhokama qilindi. Yoshlar bilan muloqot jarayonida ular tomonidan ilgari surilgan takliflar va tashabbuslar tumanning amaliy ishlariga kiritish yuzasidan tavsiyalar berildi.

 Suhbat ochiq va do‘stona ruhda o‘tdi. Tadbir yoshlarda kelajakka ishonch, vatanparvarlik va faol fuqarolik pozitsiyasini mustahkamlashga xizmat qildi. Shuningdek, uchrashuv orqali tuman hokimligi va yoshlar o‘rtasida muntazam muloqot platformasi yaratildi, bu esa kelajakda yangi loyihalar va tashabbuslarni amalga oshirishga qulay imkoniyatlar yaratadi.